نیو یارک: (رائیٹ ناوٴ نیوز) انسٹاگرام نے مواد کی معیاریت اور بامعنی انگیجمنٹ کے فروغ کے لیے ہیش ٹیگز کے استعمال پر نئی پابندی عائد کی ہے۔ اب ہر پوسٹ میں صرف 5 ہیش ٹیگز استعمال کیے جا سکیں گے۔

انسٹاگرام کے سربراہ ایڈم موسیری نے اپنے انسٹاگرام ایڈوائس چینل پر وضاحت کی ہے کہ کم مگر مخصوص ہیش ٹیگز، طویل اور عمومی فہرستوں کے مقابلے میں بہتر نتائج دیتے ہیں۔

موسیری نے کہا ہے کہ معیار کو تعداد پر ترجیح دینا ضروری ہے، اگرچہ ہیش ٹیگز مواد کی تلاش میں مددگار ثابت ہوتے ہیں، تاہم یہ خود بخود پوسٹس کی رسائی میں اضافہ نہیں کرتے۔ تخلیق کاروں کو ایسا مواد تیار کرنا چاہیے جو ناظرین سے حقیقی طور پر ہم آہنگ ہو۔

یہ اقدام تھریڈز میں پہلے متعارف کرائی گئی پالیسی سے مماثلت رکھتا ہے، جہاں ہر پوسٹ میں صرف 1 ٹیگ کی اجازت دی گئی تھی۔ اس کا مقصد اسپام کی حوصلہ شکنی اور انگیجمنٹ میٹرکس کے غلط استعمال کو روکنا ہے۔

ماہرین کے مطابق اس تبدیلی سے انسٹاگرام مارکیٹنگ اور مواد کی دریافت کے طریقہ کار میں نمایاں تبدیلی آ سکتی ہے۔ انسٹاگرام صارفین کو زیادہ سوچ سمجھ کر مواد شیئر کرنے کی ترغیب دے رہا ہے، جہاں توجہ ٹیگز کی کثرت کے بجائے مواد اور ناظرین کے درمیان تعلق پر مرکوز ہوگی۔