کوئٹہ: (رائیٹ ناوٴ نیوز) بلوچستان کے مچھ-سبی سیکشن میں نامعلوم شرپسندوں نے جمعہ کی شام ریلوے ٹریک کو دیسی ساختہ بم سے نشانہ بنایا، جس سے ریلوے ٹریک کا ایک حصہ تباہ ہو گیا اور حکام کو کئی مسافر ٹرین سروسز معطل کرنے پر مجبور ہونا پڑا۔

دھماکے کے بعد سیکیورٹی فورسز نے متاثرہ علاقے کو گھیرے میں لے لیا جبکہ بم ڈسپوزل اور تحقیقات ٹیموں نے شواہد اکٹھے کیے۔ حکام نے حملے کی نوعیت جاننے اور ذمہ داروں کی شناخت کے لیے باضابطہ تحقیقات شروع کر دی ہیں۔

ریلوے حکام کے مطابق دھماکے سے ٹریک کے تین فٹ سے زائد حصے کو نقصان پہنچا، جس کے بعد ہنگامی ٹیمیں موقع پر پہنچیں۔ متاثرہ سیکشن کی مرمت کر دی گئی، لیکن سیکیورٹی کلیئرنس نہ ہونے کی وجہ سے ٹرین آپریشنز معطل رہے۔

حکام نے بتایا کہ ٹرین آپریشنز مکمل طور پر بحال تب ہوں گے جب سیکیورٹی ایجنسیاں کلیئرنس دیں گی، کیونکہ مسافروں کی حفاظت اولین ترجیح ہے۔

ایک الگ واقعے میں کوئٹہ-کولپور ریلوے سیکشن کے قریب دھماکہ خیز مواد پھٹا، تاہم ٹریک کو کوئی جسمانی نقصان نہیں پہنچا۔

ان واقعات کے بعدسیکیورٹی خدشات کی وجہ سےحکام نے جعفر ایکسپریس اور بولان میل سروسز کو منسوخ کر دیا،ریلوے ذرائع نے بتایا کہ یہ فیصلہ مسافروں کی حفاظت کو یقینی بنانے کے لیے کیا گیا تاوقتیکہ علاقہ مکمل محفوظ ہو۔

کوئٹہ ریلوے اسٹیشن پر انتظار کرنے والے مسافروں نے اچانک منسوخیوں کی وجہ سے پریشانی اور غیر یقینی کی کیفیت کا سامنا کیا۔ ریلوے عملہ مسافروں کی مدد کرتا نظر آیا اور ایمرجنسی پروٹوکول کے تحت صورتحال کو سنبھالا۔

مسافروں کی تکلیف کو کم کرنے کے لیے حکام نے اعلان کیا کہ ایک خصوصی جعفر ایکسپریس آج (ہفتہ) صبح 8 بجے کوئٹہ سے روانہ ہوگی، جبکہ دوسری جعفر ایکسپریس معمول کے شیڈول کے مطابق، سیکیورٹی کلیئرنس کے تحت چلے گی۔

جعفر ایکسپریس کو کوہستان بولان وادی کے علاقے میں عسکریت پسند حملوں کا نشانہ بنایا جاتا رہا ہے۔ مارچ میں ٹرین کو اغوا کیا گیا، جس سے اس اسٹریٹجک ریلوے روٹ پر مسافروں کی حفاظت کے دیرینہ خدشات بڑھ گئے ہیں۔