کراچی: (رائیٹ ناوٴ نیوز) کراچی میں راوں سال کتے کے کاٹنے کے 29ہزار واقعات رپورٹ ہوئے جبکہ 19 افراد ریبیز کے باعث جاں بحق ہوئے ہیں۔ شہر کے مختلف علاقے جیسے لانڈھی، کورنگی، ڈی ایچ اے، محمود آباد، اورنگی ٹاؤن اور ملیر میں آوارہ کتوں کی تعداد میں اضافہ ہوا ہے، جس کی وجہ سے رہائشی خوف و ہراس میں مبتلا ہیں۔

طبی ماہرین نے خبردار کیا ہے کہ ریبیز کی علامات ظاہر ہونے کے بعد یہ بیماری لاعلاج ہوتی ہے۔ علامات میں سر درد اور بے چینی شامل ہیں، لیکن بیماری بڑھتے بڑھتے مریضوں کو پانی اور ہوا سے خوف محسوس ہونے لگتا ہے۔

کراچی کے بڑے ہسپتال کتے کے کاٹنے کے متاثرین کی تعداد سے نمٹنے میں مشکلات کا سامنا کر رہے ہیں۔ انڈس ہسپتال میں روزانہ تقریباً 150 کیسز رپورٹ ہو رہے ہیں۔ جنوری سے اب تک ہسپتال نے 16ہزار سے زائد کیسز کا علاج کیا ہے، جن میں سے آٹھ مریض ریبیز سے جاں بحق ہو چکے ہیں۔

ڈاکٹر محمد افتاب گوہر نے کہا ہے کہ ریبیز کے کیسز ہر سال بڑھ رہے ہیں۔ اگر کتے کے لعاب دہن خون میں داخل ہو جائے تو وائرس دماغ تک پہنچ جاتا ہے۔

ورلڈ ہیلتھ آرگنائزیشن کے مطابق کتے کے کاٹنے کے بعد زخم کو صابن سے دھونا اور کم از کم 10 منٹ تک صاف پانی ڈالنا ضروری ہے۔ اس کے بعد متاثرہ افراد کو اینٹی ریبیز ویکسین دی جانی چاہیے۔

رہائشیوں نے حکومتی حکام سے مطالبہ کیا ہے کہ وہ آوارہ کتوں کے لیے شیلٹر ہومز قائم کریں تاکہ شہری خوف میں مبتلا نہ ہوں۔