کراچی: (رائیٹ ناؤ نیوز) کراچی میں تاجروں سے بھتہ خوری کے بڑھتے ہوئے واقعات کے پیش نظر وفاقی وزارتِ داخلہ نے انٹرپول سے رابطہ کرتے ہوئے بھتہ خوروں کی گرفتاری کے لیے اہم اقدامات کیے ہیں۔ سندھ پولیس کی سفارش پر وزارت داخلہ نے انٹرپول کو خط ارسال کیا ہے، جس میں بھتہ خوروں کی فہرست شامل کی گئی ہے تاکہ بیرون ملک موجود ملزمان کو گرفتار کیا جا سکے۔

وزارت داخلہ نے انٹرپول سے گینگ وار سے منسلک مبینہ بھتہ خور وصی لاکھو اور احمد مگسی کی گرفتاری کے لیے بھی رابطہ کیا ہے۔ کراچی کے بلڈرز نے حالیہ پریس کانفرنس میں بھتہ خوری کے خلاف اپنے تحفظات کا اظہار کیا تھا۔

وزیراعلیٰ سندھ مراد علی شاہ نے بھتہ خوری کے خلاف سخت کارروائی کا حکم دیا ہے۔ انہوں نے بلڈرز کے وفد سے ملاقات میں بھتہ مافیا کی پرچیاں اور موبائل نمبرز حاصل کیے اور زیرو ٹالرنس پالیسی کے تحت کارروائی کا عزم کیا۔

وزیر داخلہ سندھ ضیاء الحسن نے بتایا کہ صوبے بھر میں بھتہ مافیا کے خلاف کارروائیاں جاری ہیں اور اب تک 50 بھتہ خور گرفتار ہو چکے ہیں۔ کراچی پولیس نے بھتہ مافیا کے ایک گینگ کے سرغنہ کے بھائی کو گرفتار کر لیا ہے جبکہ وفاقی اداروں سے تعاون کا فیصلہ کیا گیا ہے۔