اسلام آباد: (رائیٹ ناوٴ نیوز) ایشیائی ترقیاتی بینک (اے ڈی بی) اور ورلڈ بینک نے پاکستان کو ریاستی ملکیتی اداروں (ایس او ایز)، پانی کے شعبے اور بنیادی صحت و صفائی کی خدمات کے لیے مجموعی طور پر 940 ملین ڈالر کی منظوری دی ہے۔

کل رقم میں سے منیلا میں قائم اے ڈی بی 540 ملین ڈالر قرض اور امداد کی صورت میں فراہم کرے گا جبکہ واشنگٹن میں قائم ورلڈ بینک 400 ملین ڈالر کا قرض فراہم کرے گا۔

اے ڈی بی نے اپنے بورڈ آف ڈائریکٹرز کے ذریعے پاکستان میں ایس او ای اصلاحات کو تیز کرنے اور سندھ کے ساحلی اضلاع میں قدرتی آفات کے خلاف مزاحمت بڑھانے کے لیے 540 ملین ڈالر کے دو منصوبوں کی منظوری دی ہے۔

سندھ میں ساحلی مزاحمت کے منصوبے کا مقصد بدین، سجاول اور ٹھٹھہ کے اضلاع میں قدرتی آفات کے خلاف مزاحمت کو مضبوط بنانا ہے۔ یہ منصوبہ 5 لاکھ سے زیادہ لوگوں کی زندگی کو بہتر بنانے، 1.5 لاکھ ہیکٹر زرعی زمین کی حفاظت اور 22,000 ہیکٹر جنگلات کی بحالی میں معاون ثابت ہوگا۔

ورلڈ بینک نے پنجاب میں محفوظ پانی، صفائی اور بنیادی حفظان صحت کی خدمات فراہم کرنے کے لیے 400 ملین ڈالر کی مالی معاونت کی منظوری دی ہے۔ یہ پروگرام پنجاب کے 16 ثانوی شہروں میں پانی کی فراہمی اور نکاسی کے نظام کی بہتری، مقامی حکومتوں کی کارکردگی میں بہتری اور ٹھوس فضلہ کے انتظام کے نظام کو بہتر بنانے میں مدد دے گا۔