نئی دہلی: (رائیٹ ناوٴ نیوز) بھارتی وزیراعظم نریندر مودی نے جمعرات کو امریکی صدر ڈونلڈ ٹرمپ سے ٹیلیفون پر گفتگو کی، جب کہ بھارت امریکی تجارتی پابندیوں سے نجات کی کوشش کر رہا ہے جو کہ روسی تیل کی خریداری کی وجہ سے عائد کی گئی ہیں۔

مودی نے ایک پوسٹ میں کہا کہ ہم نے دو طرفہ تعلقات میں پیش رفت کا جائزہ لیا اور علاقائی و بین الاقوامی امور پر تبادلہ خیال کیا۔ وائٹ ہاؤس کے ایک اہلکار نے کال کی تصدیق تو کی، لیکن مزید تفصیلات نہیں دیں۔

مودی اور ٹرمپ کے مابین یہ تیسری گفتگو تھی جب سے ٹرمپ نے بھارتی درآمدات پر محصولات دگنا کر کے 50 فیصد تک کر دیے ہیں، جس سے ٹیکسٹائل، کیمیکلز اور خوراکی اشیاء جیسے جھینگے کی برآمدات متاثر ہو رہی ہیں۔

مودی کا کہنا تھا کہ ان کی گفتگو گرم جوش اور دوستانہ تھی اور دونوں ممالک عالمی امن، استحکام اور خوشحالی کے لیے کام کرتے رہیں گے۔

دونوں ممالک کے درمیان تجارتی مذاکرات جولائی کے آخر میں ناکام ہو گئے تھے، جب بھارت نے امریکی زرعی مصنوعات کے لیے اپنی مارکیٹ کھولنے سے انکار کر دیا تھا۔

امریکی نائب تجارتی نمائندے رِک سوئٹزر نے اس ہفتے دو روزہ دورے کے دوران بھارتی حکام سے ملاقات کی تاکہ واشنگٹن کی طرف سے عائد کردہ پابندیوں سے نجات کی کوشش کی جا سکے۔

روس کے صدر ولادیمیر پوتن بھی گزشتہ ہفتے بھارت کے دورے پر تھے، جہاں انہوں نے بھارت کو تیل کی بلا تعطل فراہمی کی پیشکش کی۔

امریکی دباؤ کے تحت بھارتی برآمدات اکتوبر میں تقریباً 9 فیصد کم ہوکر 6.31 ارب ڈالر رہ گئیں، جبکہ واشنگٹن بھارت پر زور دے رہا ہے کہ وہ امریکی مصنوعات پر محصولات میں کمی کرے۔