واشنگٹن: (رائیٹ ناوٴ نیوز) امریکا نے پاکستان کے F-16 جنگی جہازوں کے لیے 686 ملین ڈالر مالیت کی جدید ٹیکنالوجی اور معاونت کی فروخت کی منظوری دے دی ہے۔ امریکی دفاعی سلامتی تعاون ایجنسی نے کانگریس کو 8 دسمبر کو بھیجے گئے خط میں بتایا کہ یہ پیکج Link-16 سسٹمز، کرپٹوگرافک آلات، ایویانکس اپ ڈیٹس، تربیت اور جامع لاجسٹک سپورٹ پر مشتمل ہے۔

خط میں کہا گیا ہے کہ یہ فروخت امریکا کی خارجہ پالیسی اور قومی سلامتی کے اہداف حاصل کرنے میں مددگار ہو گی، جس سے پاکستان کو امریکا اور شراکت دار افواج کے ساتھ جاری انسداد دہشت گردی کی کوششوں میں شراکت داری برقرار رکھنے میں مدد ملے گی۔

فروخت کا مقصد پاکستان کے F-16 بیڑے کی جدید کاری اور آپریشنل حفاظت کے خدشات کو حل کرنا بھی ہے۔ یہ اپ ڈیٹس پاکستان کی فضائیہ اور امریکی فضائیہ کے درمیان زیادہ مربوط آپریشنز، تربیت اور مشقوں کی سہولت فراہم کریں گی۔

خط کے مطابق پاکستان نے اپنی مسلح افواج کو جدید تر بنانے کا عزم ظاہر کیا ہے اور اس ٹیکنالوجی کو شامل کرنے میں کوئی مشکل نہیں ہوگی۔ فروخت سے خطے میں فوجی توازن متاثر نہیں ہوگا۔

فورٹ ورتھ، ٹیکساس کی کمپنی لاک ہیڈ مارٹن اس فروخت کے لئے بنیادی ٹھیکیدار ہوگی۔ فروخت کی کل مالیت 686 ملین ڈالر ہے جس میں 37 ملین ڈالر کی دفاعی آلات اور 649 ملین ڈالر کی دیگر اشیاء شامل ہیں۔