کراچی: (رائیٹ ناوٴ نیوز) معروف مارننگ شو کی میزبان ندا یاسر نے فوڈ ڈیلیوری رائیڈرز سے اپنے الفاظ کے چُناؤ پر معافی مانگ لی ہے۔ انہوں نے انسٹاگرام پر ایک ویڈیو پیغام میں کہا کہ پچھلے پروگرام میں انہوں نے اپنا ذاتی تجربہ شیئر کیا تھا، اور الفاظ کے چُناؤ میں کوتاہی کی جو کہ براہِ راست شو میں ممکن ہے۔ ندا نے کہا کہ کچھ رائیڈرز کے حوالے سے بات کرتے ہوئے انہیں یہ کہنا چاہیے تھا کہ تمام رائیڈرز پر یہ بات لاگو نہیں ہوتی۔

ندا نے وضاحت کی کہ ہر کام کرنے والے کی پانچوں انگلیاں برابر نہیں ہوتیں اور بہت سے رائیڈرز ایمانداری سے کام کر رہے ہیں۔ انہوں نے مزید کہا کہ کچھ الفاظ کے چُناؤ کی وجہ سے ان کا مقصد غلط سمجھا گیا اور وہ کسی کی دل آزاری نہیں کرنا چاہتی تھیں۔ ندا نے کہا کہ وہ انسان ہیں اور اگر ان کے الفاظ سے کسی کو دُکھ پہنچا ہو تو وہ معذرت خواہ ہیں۔

یاد رہے کہ ندا یاسر نے اپنے شو میں کہا تھا کہ بعض ڈیلیوری رائیڈرز جان بوجھ کر چھوٹا پیسہ ساتھ نہیں رکھتے تاکہ کسٹمرز کو اضافی ٹپ دینے پر مجبور کیا جا سکے، جس پر سوشل میڈیا صارفین نے شدید ردعمل ظاہر کیا تھا۔