راولپنڈی: (رائیٹ ناوٴ نیوز) راولپنڈی میں ترمیمی ٹرانسپورٹ آرڈیننس اور بھاری جرمانوں کے خلاف احتجاج بڑھ گیا ہے۔ شہر کے گڈز ٹرانسپورٹرز نے 8 دسمبر کو پاکستان متحدہ ٹرانسپورٹرز ایکشن کمیٹی کی اعلان کردہ ہڑتال کی حمایت کا اعلان کیا ہے۔

گڈز ٹرانسپورٹ ایسوسی ایشن راولپنڈی کے صدر شکیل قریشی نے کہا کہ 8 دسمبر کو راولپنڈی کے تمام اڈے مکمل طور پر بند رہیں گے۔ ان کے مطابق پنجاب اسمبلی کے ٹریفک قوانین اور جرمانوں کی نئی شرح ٹرانسپورٹروں پر غیر ضروری بوجھ ڈال رہی ہے۔

شکیل قریشی نے کسٹمز قوانین میں ترامیم کو ٹرانسپورٹرز کے معاشی قتل کے مترادف قرار دیا اور حکومت سے ظالمانہ قوانین واپس لینے کا مطالبہ کیا۔ انہوں نے نشاندہی کی کہ حکومتی فیصلوں میں عوامی مفاد کو نظرانداز کیا جا رہا ہے۔

شکیل قریشی نے حکومت پر زور دیا کہ وہ ٹرانسپورٹرز کے نمائندوں کے ساتھ مشاورت کرے اور پھر قانون سازی کرے۔ انہوں نے واضح کیا کہ مطالبات کی منظوری تک ٹرانسپورٹ بحال نہیں کی جائے گی۔