پشاور: (رائیٹ ناوٴ نیوز) وزیراعلیٰ خیبر پختونخوا سہیل آفریدی نے کہا ہے کہ وفاقی حکومت 5 ہزار 300 ارب کی کرپشن میں ملوث ہے، جو عوام کے ٹیکس کے پیسوں سے بیرون ملک جزیرے خرید رہی ہے۔ انہوں نے عوام کو ہدایت کی کہ وہ اپنے حکمرانوں سے اس بارے میں سوال کریں۔

یونیورسٹی آف انجینئرنگ اینڈ ٹیکنالوجی پشاور میں جاب فیئر 2025 کے موقع پر وزیراعلیٰ نے کہا کہ اس اقدام سے دو ہزار طلبہ باضابطہ ملازمت کے ساتھ رجسٹرڈ ہو چکے ہیں۔ انہوں نے نوجوانوں کے لئے ٹیلنٹ ہنٹ پروگرام اور انٹرنشپ پالیسی متعارف کرانے کا اعلان کیا۔

سہیل آفریدی نے کہا کہ انصاف اسٹوڈنٹس فیڈریشن کو اپنی توانائی بچا کر رکھنی چاہیے کیونکہ ابھی بہت کام باقی ہے۔ انہوں نے مزید کہا کہ آئندہ پروگراموں میں اردو زبان کا استعمال کیا جائے گا تاکہ خیبر پختونخوا کے عوام کو آگاہی ہو۔

وزیراعلیٰ نے مزید کہا کہ 4 دسمبر کو این ایف سی ایوارڈ ہوگا جس میں فاٹا کے حصے کا معاملہ اٹھایا جائے گا۔ انہوں نے کہا کہ ضم علاقوں کو ان کا حق نہیں مل رہا، جس کا سالانہ شیئر 400 ارب بنتا ہے۔

انہوں نے چیئرمین پی ٹی آئی کے ناحق جیل میں ہونے اور القادر یونیورسٹی کے خلاف کیسز کے بارے میں بھی بات کی اور اس پر خاموشی کی مذمت کی۔