اسلام آباد: (رائیٹ ناوٴ نیوز) ایرانی سپریم نیشنل سیکیورٹی کونسل کے سیکریٹری علی لاریجانی نے کہا ہے کہ پاکستان میں دورے کے دوران ان کا زبردست استقبال کیا گیا اور وہ اس کے لیے شکر گزار ہیں۔ انہوں نے میڈیا سے گفتگو میں کہا کہ وہ پاکستان کو اپنا دوسرا گھر سمجھتے ہیں اور اسرائیل جنگ کے دوران پاکستان کی حمایت کے شکر گزار ہیں۔

لاریجانی نے فیلڈ مارشل عاصم منیر سے ملاقات کی اور کہا کہ ایران اور پاکستان کے درمیان مضبوط بھائی چارے پر مبنی تعلقات ہیں۔ انہوں نے ایران کی طرف سے پاکستان اور افغانستان کے درمیان ثالثی کی تیاری کا اظہار کرتے ہوئے کہا کہ پاکستان خطے کا اہم اور ذمہ دار ملک ہے اور ایران قیام امن میں کردار ادا کرتا رہے گا۔

لاریجانی نے کہا کہ پاکستان اور ایران فلسطین میں قیام امن کے لیے عزم رکھتے ہیں اور چاہتے ہیں کہ مسئلہ فلسطین کا پرامن حل نکلے۔ انہوں نے پاک افواج کی بہادری اور کامیابی کی تعریف کرتے ہوئے کہا کہ ان کی پاکستان میں صدر، وزیراعظم اور دیگر اعلیٰ حکام سے اہم ملاقاتیں ہوئیں۔

انہوں نے مزید کہا کہ پاکستان اور ایران ہر مشکل وقت میں ایک دوسرے کے ساتھ رہے ہیں اور قیام امن کے لیے سب کو کردار ادا کرنا ہوگا۔