نیویارک: (رائیٹ ناوٴ نیوز) امریکہ میں ویِل کارنل میڈیسن کے محققین نے ایک نئی تحقیق میں انکشاف کیا ہے کہ ٹیومر ایک خاص سگنل استعمال کرتے ہیں جو ٹی خلیوں کو تھکا دیتے ہیں، اور اگر اس سگنل کو خاموش کر دیا جائے تو جسم کی مدافعتی قوت دوبارہ زندہ ہو سکتی ہے۔

نیچر امیونولوجی میں شائع تحقیق کے مطابق، ٹیومر ایک مادّہ تھرومبو اسپونڈن-1 بناتا ہے، جو مدافعتی خلیوں پر موجود پروٹین سی ڈی47 کو فعال کر کے خلیوں کی طاقت کم کر دیتا ہے۔

ماہرین نے تجرباتی طور پر ایک مرکب ٹیکس2 استعمال کیا، جس سے یہ نقصان دہ رابطہ رک گیا اور مدافعتی خلیے دوبارہ سرگرم ہو گئے۔ اس مرکب کے بعد چوہوں میں ٹیومر کی بڑھوتری سست ہو گئی اور مدافعتی خلیے زیادہ طاقتور ہو کر ٹیومر پر بہتر حملہ کرنے لگے۔

ماہرین کے مطابق، جب اس طریقے کو موجودہ علاج پی-ڈی-1 کے ساتھ ملایا گیا تو اثر مزید بڑھ گیا۔ یہ دریافت مستقبل میں کینسر کے علاج، خاص طور پر مدافعتی علاج کے لیے ایک اہم قدم ثابت ہو سکتی ہے۔