اسلام آباد: (رائیٹ ناوٴ نیوز) پاکستان پیپلزپارٹی نے فیصل ممتاز راٹھور کو وزیراعظم آزاد کشمیر کے لئے نامزد کر دیا ہے۔ اسلام آباد میں میڈیا سے گفتگو کرتے ہوئے پیپلزپارٹی کے رہنما راجہ پرویز اشرف نے کہا کہ تحریک عدم اعتماد جمع کرانے کا فیصلہ ہو چکا ہے اور آزاد کشمیر میں حکومت بنانے کی پوری تیاری ہے۔ انہوں نے کہا کہ پیپلزپارٹی باہمی مشاورت کے ساتھ تمام فیصلے کرتی ہے اور کشمیریوں کے لئے آسانیاں لانے کی کوشش میں ہے۔ پیپلزپارٹی آزاد کشمیر کے صدر چودھری یاسین نے کہا کہ شہید بینظیر بھٹو نے کشمیر کو ہمیشہ ترجیح دی اور پیپلزپارٹی کو کشمیر کے ساتھ گہرا تعلق ہے۔

پیپلزپارٹی نے آزاد کشمیر کی سیاسی صورتحال کے تحت فیصل راٹھور کو وزیراعظم نامزد کیا ہے اور ان کے پاس حکومت بنانے کے لئے کافی تعداد موجود ہے۔ راجہ پرویز اشرف نے کہا کہ فیصل راٹھور پڑھا لکھا اور تجربہ کار نوجوان ہیں اور پیپلزپارٹی کشمیر میں مسائل کو حل کرنے کے لئے نکلے گی۔ انہوں نے مزید کہا کہ وزیراعظم شہباز شریف نے کشمیری عوام کے ساتھ کھڑے ہونے کا اعلان کیا ہے۔

وزیراعظم آزاد کشمیر چودھری انوار الحق نے مستعفی نہ ہونے اور تحریک عدم اعتماد کا مقابلہ کرنے کا فیصلہ کیا ہے۔