واشنگٹن: (رائیٹ ناوٴ نیوز) امریکی انٹیلی جنس نے انکشاف کیا ہے کہ اسرائیلی اہلکاروں نے غزہ میں فلسطینیوں کو انسانی ڈھال کے طور پر استعمال کرنے کا اعتراف کیا ہے۔ یہ معلومات سابق امریکی صدر جو بائیڈن کی حکومت کے آخری ہفتوں میں وائٹ ہاؤس کو پیش کی گئی تھیں۔

دو سابق امریکی حکام کے مطابق، انٹیلی جنس معلومات میں یہ بتایا گیا کہ اسرائیلی فوجیوں نے فلسطینیوں کو ان سرنگوں میں بھیجا جو ممکنہ طور پر بارودی مواد سے بھری ہو سکتی تھیں۔ یہ معلومات وائٹ ہاؤس کے ساتھ شیئر کی گئیں اور بائیڈن انتظامیہ نے ان پر تشویش کا اظہار کیا۔

ذرائع کے مطابق، 2024 کے آخر میں جمع کی گئی ان معلومات نے وائٹ ہاؤس میں سوالات اٹھا دیے کہ آیا یہ طریقہ کار وسیع پیمانے پر استعمال ہو رہا تھا۔ حکام نے وضاحت نہیں دی کہ انٹیلی جنس میں جن فلسطینیوں کا ذکر ہے وہ عام شہری تھے یا قیدی۔

اسرائیلی فوج نے بیان میں کہا کہ وہ عام شہریوں کو انسانی ڈھال کے طور پر استعمال کرنے کی سختی سے ممانعت کرتی ہے اور ان الزامات کی تحقیقات شروع کر دی ہیں۔ دوسری جانب، حماس پر بھی شہریوں کو انسانی ڈھال کے طور پر استعمال کرنے کا الزام لگایا گیا، جس کی حماس نے تردید کی ہے۔