[یوکرین]: (رائیٹ ناوٴ نیوز) یوکرین نے روسی ڈرون حملوں سے بچنے کے لیے فرانس کے ماہی گیری جالوں کا کامیاب استعمال شروع کر دیا ہے۔ یہ جال، جو پہلے سمندری مچھلیاں پکڑنے کے لیے استعمال ہوتے تھے، اب آسمانوں میں ڈرونز کو پھانسنے کے لیے استعمال کیے جا رہے ہیں۔

برطانوی خیراتی ادارے کرنک سولیڈیریٹیز نے فرانس سے 280 کلومیٹر لمبائی کے جال یوکرین بھیجے ہیں، جو اب فوجیوں اور شہریوں کو ڈرون حملوں سے بچانے کے لیے استعمال ہو رہے ہیں۔ روسی افواج کے کم قیمت ڈرونز، جو دھماکا خیز مواد سے بھرے ہوتے ہیں، ان جالوں میں پھنس کر ناکام ہو جاتے ہیں۔

ادارے کے لاجسٹکس سربراہ نے بتایا کہ یہ جال گہرے سمندر میں طاقتور مچھلیاں پکڑنے کے لیے تیار کیے گئے تھے، لیکن اب یہ جال جنگی میدان میں کارآمد ثابت ہو رہے ہیں۔ ابتدا میں یہ جال طبی کیمپوں کے تحفظ کے لیے استعمال ہوئے تھے، لیکن اب سڑکوں، پلوں اور اسپتالوں پر بھی لگائے جا رہے ہیں۔

کرنک سولیڈیریٹیز کے صدر نے کہا کہ یوکرین کے سفیر نے فرانس کے دورے پر ان کی مدد کا شکریہ ادا کیا۔ سوئڈن اور ڈنمارک کے ماہی گیر بھی یوکرین کو مزید جال عطیہ کر رہے ہیں تاکہ دفاعی نظام کو وسعت دی جا سکے۔

یاد رہے کہ جولائی 2025 تک یوکرین روزانہ 500 سے زائد روسی ڈرون حملوں کا سامنا کر رہا تھا، اور اب یہ جال یوکرین کا نیا دفاعی ہتھیار بن گئے ہیں۔