لاہور: (رائیٹ ناوٴ نیوز) ہیڈ کوچ مائیک ہیسن نے بابراعظم پر اعتماد کا اظہار کرتے ہوئے ان سے جلد بڑے اسکورز کی امید ظاہر کی ہے۔ انہوں نے کہا کہ بابر تکنیکی طور پر مضبوط بیٹر ہیں اور ان کے کھیل میں کوئی کمی نہیں ہے، حالانکہ جنوبی افریقہ کے خلاف ون ڈے سیریز میں ان کا اسکور کم رہا۔

مائیک ہیسن نے کہا کہ بابر کی موجودہ فارم عارضی ہے اور وہ بڑے اسکور کے قریب ہیں۔ انہوں نے بابر کے کھیل اور گیپ میں شاٹ کھیلنے کی صلاحیت کی تعریف کی۔ بابر ٹی 20 میں بھی اچھی کارکردگی کا مظاہرہ کر چکے ہیں اور انہوں نے دباؤ کو بخوبی سہہ لیا، خاص طور پر جب پاکستان نے ابتدائی وکٹ جلد کھو دی تھی۔

ہیسن کا کہنا تھا کہ بابر کو زیادہ فکر نہیں کرنی چاہیے کہ ہر اسٹارٹ کو بڑے رنز میں تبدیل کریں بلکہ ان کا فوکس اپنی بیٹنگ ردھم اور درست فیصلے کرنے پر ہونا چاہیے۔ پہلے میچ میں گیند کی کم اونچائی نے بابر کو نقصان پہنچایا تھا، جبکہ تیسرے میچ میں انہوں نے دباؤ برداشت کیا اور اچھا کھیل پیش کیا مگر بدقسمتی سے رن آؤٹ ہو گئے۔

واضح رہے کہ بابر اعظم نے جنوبی افریقا کے خلاف 3 ون ڈے میچز کی سیریز میں 45 رنز بنائے اور پاکستان نے پہلی بار اپنے ملک میں ان کے خلاف سیریز جیتی۔ بابر اعظم اگلے تین ون ڈے میچز کی سیریز میں سری لنکا کے خلاف کھیلیں گے جو 11 نومبر سے راولپنڈی کرکٹ اسٹیڈیم میں شروع ہوگی۔