واشنگٹن: (رائیٹ ناوٴ نیوز) امریکی سینیٹ نے حکومتی فنڈنگ کے ایک معاہدے کی منظوری دے دی ہے جس کے بعد امریکی تاریخ کے طویل ترین شٹ ڈاؤن کے اختتام کی امید پیدا ہو گئی ہے۔ ڈیموکریٹ سینیٹرز کے ایک گروپ نے معاہدے کے حق میں ووٹ دیا، تاہم ابھی ایوان کی منظوری باقی ہے۔

شٹ ڈاؤن کی وجہ سے لاکھوں سرکاری ملازمین بغیر تنخواہ کے کام کر رہے تھے، اور حکومتی امور متاثر ہو رہے تھے۔ سینیٹ میں ڈیموکریٹس کی مخالفت کے باوجود معاہدہ منظور ہو گیا۔

پارٹی رہنماؤں نے کہا کہ وہ اس وقت تک نئی فنڈنگ کی حمایت نہیں کریں گے جب تک کانگریس ہیلتھ انشورنس سبسڈی پر بات چیت نہیں کرتی۔ سینیٹ میں اتفاق کے باوجود ریپبلکن کے زیر کنٹرول ایوان کی منظوری ضروری ہے۔

معاہدے کے تحت اگست تک فوج، زراعت اور قانون سازی کے لیے فنڈز دستیاب ہوں گے۔ یہ معاہدہ جنوری تک دیگر سرکاری پروگراموں کو بھی فنڈ فراہم کرے گا، تاہم آئندہ ایک اور شٹ ڈاؤن کا خطرہ موجود ہے۔

صدر ٹرمپ اور ریپبلکن نتائج سے مطمئن ہیں، جبکہ ڈیموکریٹس میں اختلافات کا خدشہ ہے، کیونکہ انشورنس سبسڈی کے مسئلے کو حل کیے بغیر آگے بڑھا گیا۔