اسلام آباد: (رائیٹ ناوٴ نیوز) سینیٹ اور قومی اسمبلی کی مشترکہ پارلیمانی کمیٹی نے 27ویں آئینی ترمیم کے مجوزہ ڈرافٹ کی منظوری دے دی ہے، جس میں مسلح افواج کے سربراہوں کی تقرری کے حوالے سے اہم ترامیم شامل ہیں۔

اجلاس پارلیمنٹ ہاؤس کے کمیٹی روم نمبر 5 میں منعقد ہوا جس کی صدارت پیپلز پارٹی کے سینیٹر فاروق ایچ نائیک نے کی۔ اس اجلاس میں وزیر قانون اعظم نزیر تارڑ، وزیر مملکت بلال اظہر کیانی اور دیگر اہم شخصیات نے شرکت کی۔

اجلاس کے دوران آئینی عدالت کے قیام، آرٹیکل 243 اور آرٹیکل 200 پر مشاورت مکمل کی گئی۔ اجلاس میں ن لیگ، ایم کیو ایم اور دیگر جماعتوں کی تجاویز پر غور کیا گیا اور پارلیمانی جماعتوں کے ارکان کو رائے دینے کا حق دیا گیا۔

کمیٹی نے ججز کے تبادلوں اور جوڈیشل کمیشن کی تشکیل نو کے بارے میں مجوزہ ترامیم کی بھی منظوری دی۔ اجلاس میں وزیراعظم کے استثنیٰ سے متعلق شق واپس لے لی گئی اور دیگر آئینی ترامیم پر بھی غور کیا گیا۔

کمیٹی کا اجلاس آئندہ روز پارلیمنٹ میں پیش کرنے کے لیے تیار ہے، جہاں اتحادی جماعتوں کی مزید تجاویز پر غور ہوگا۔