واشنگٹن: (رائیٹ ناوٴ نیوز) امریکی صدر ڈونلڈ ٹرمپ نے اعلان کیا ہے کہ امریکہ کا کوئی بھی عہدیدار اس سال جنوبی افریقہ میں ہونے والی جی20 سمٹ میں شرکت نہیں کرے گا۔ ٹرمپ نے دعویٰ کیا کہ جنوبی افریقہ میں سفید فام کسانوں کو قتل اور بدسلوکی کا سامنا ہے۔ پہلے نائب صدر جے ڈی وینس کو اجلاس میں شرکت کے لیے بھیجا جانا تھا، مگر اب انہیں بھی واپس بلا لیا گیا ہے۔

ٹرمپ نے اپنی سوشل میڈیا سائٹ پر کہا کہ جنوبی افریقہ میں جی20 اجلاس کا انعقاد شرمناک ہے اور جب تک انسانی حقوق کی خلاف ورزیاں جاری رہیں گی، کوئی امریکی عہدیدار اس اجلاس میں شریک نہیں ہوگا۔ وہ 2026 میں میامی، فلوریڈا میں جی20 کی میزبانی کے منتظر ہیں۔

جنوبی افریقا کے وزارت خارجہ نے ٹرمپ کے الزامات کو افسوسناک قرار دیتے ہوئے کہا کہ جی20 سمٹ کے کامیاب انعقاد کے لیے پرعزم ہیں۔ انہوں نے کہا کہ افریکنرز کو خاص طور پر سفید فام گروہ کے طور پر بیان کرنا تاریخی طور پر غلط ہے اور ان پر ظلم و ستم کے دعوے حقائق سے بے بنیاد ہیں۔

جنوبی افریقی حکام کا کہنا ہے کہ سفید فام افراد کا معیار زندگی سیاہ فام باشندوں کے مقابلے میں بہتر ہے اور یہ صورتحال اپارتھائڈ کے خاتمے کے تین دہائیاں بعد بھی برقرار ہے۔