اسلام آباد: (رائیٹ ناوٴ نیوز) نیوٹک اور نیٹسول نے آرٹیفیشل انٹیلی جنس اور جدید مہارتوں کی ترقی کے حوالے سے مفاہمتی یادداشت پر دستخط کیے ہیں۔ اس تقریب میں نیشنل ووکیشنل اینڈ ٹیکنکل ٹریننگ کمیشن اور نیٹسول انسٹیوٹ آف آرٹیفیشل انٹیلیجنس کے نمائندے شریک ہوئے۔

معاہدے کا مقصد جدید ٹیکنالوجیز خصوصاً اے آئی میں تربیت فراہم کرکے اکیڈمی اور صنعت کے درمیان فرق کو ختم کرنا ہے۔ اس میں نیوٹک کے سمر آف کوڈ پروگرام شامل ہیں جو مختلف آئی ٹی اور ابھرتی ہوئی ٹیکنالوجیز جیسے اے آئی، ویب ڈویلپمنٹ، اور گرافک ڈیزائننگ کے کورسز پیش کرتے ہیں۔

یہ پروگرام بے روزگار نوجوانوں اور پیشہ ور افراد کو جدید مہارتوں میں اضافہ کرنے کا موقع فراہم کرتا ہے۔ اس کے لیے میٹرک کی تعلیم اور عمر کی حد 18-40 سال مقرر کی گئی ہے۔

یہ تعاون پاکستان میں اعلیٰ سطحی اے آئی ٹیلنٹ کو فروغ دینے اور تکنیکی خود انحصاری کی جانب ایک اہم قدم ہے۔